Í aðdraganda Vísindavöku verður hellt upp á Vísindakaffi, þar sem fræðimenn kynna viðfangsefni sín á óformlegan hátt í kósý kaffihúsastemmningu.
Í ár verður boðið upp á þrjú Vísindakaffi á kaffihúsinu Kaffi Læk í Reykjavík og má finna dagskrá hér að neðan.
Engill dauðans - af spænsku veikinni 1918 og áskorunum samtímans. Magnús Gottfreðsson, Bryndís Sigurðardóttir og Ólafur Guðlaugsson, smitsjúkdómalæknar.
Fjallað verður um spænsku veikina sem herjaði á Ísland 1918, en á heimsvísu er talið að allt að 100 milljónir manna hafi látist af völdum veikinnar. Hvaða lærdóm er hægt að draga af þessum mannskæðasta faraldri sögunnar?
Fyrirboðar eldgosa. Freysteinn Sigmundsson, Norræna eldfjallasetrinu, Jarðvísindastofnun HÍ.
Hvað gerist í rótum eldstöðva fyrir eldgos og hverjir eru fyrirboðar eldsumbrota. Hvaða íslensk eldfjöll eru að undirbúa sig undir eldgos. Vitum við hvað er mikið af kviku í rótum íslenskra eldstöðva? Hversu mikið af bergkviku streymir inn í rætur íslenskra eldfjalla í dag og hvernig getum við mælt það?
Gervigreind, vísindi og framtíð mannkyns: hvað er framundan? Kristinn R. Þórisson, prófessor við tölvunarfræðideild HR og Þröstur Thorarensen rannsakandi hjá Vitvélastofnun Íslands.
Fjórða iðnbyltingin er sögð breyta mörgu í framtíðinni, svo sem störfum, hagkerfum - jafnvel stríðsrekstri. Er eitthvað til í þeim fjölmörgu spám sem hafa komið fram undanfarið um sjálfvirka samfélagið? Allar gera þær ráð fyrir að þróun gervigreindar muni sífellt nálgast greind mannsins - og jafnvel fara framúr henni á næstu árum eða áratugum. Er sú hugmynd kannski gölluð?
Vísindakaffi er haldið í aðdraganda Vísindavöku. Þar munu vísindamenn á ýmsum fræðasviðum kynna rannsóknir sínar sem allar eiga það sameiginlegt að vera áhugaverðar fyrir fólk á öllum aldri. Gestir fá tækifæri til að spyrja og taka þátt í umræðum og komast þannig að því hvernig störf vísindamanna hafa áhrif á daglegt líf okkar allra.
Markmiðið með Vísindakaffikvöldunum er að færa vísindin nær almenningi og kynna það rannsóknastarf sem stundað er í landinu á aðgengilegan hátt.