Vísindin lifna við á Vísindavöku!

Vísindakaffi og Vísindavaka á vappi

Í ár verður ekki haldin hefðbundin Vísindavaka á einum stað, þar sem fólk getur rölt um og kynnt sér vísindin á lifandi hátt. Þess í stað verður lögð áhersla á:

Vísindakaffi

Hellt verður upp á hið sívinsæla Vísindakaffi, í þetta sinn í kaffihúsi Perlunnar í Reykjavík.

Mánudagur 20. september kl. 20:00-21:30

Loftlagsógnin! Hvaða tæknilausnir eru í farvatninu?

Til þess að ná markmiðum Parísarsamkomulagsins verður að fanga koltvíoxíð úr útblæstri orku- og iðjuvera og einnig beint úr andrúmslofti. Sigurður Reynir fjallar um Carbfix aðferðina og hvernig íslensku sandarnir geta komið þar við sögu.

Sigurður Reynir Gíslason jarðefnafræðingur og vísindamaður við Háskóla Íslands

Þriðjudagur 21. september kl. 20:00-21:30

Bólusetningar, hvaða máli skipta þær?

Sjaldan eða aldrei hefur verið rætt jafnmikið um bólusetningar og nú. Ingileif fjallar um þýðingu bólusetninga á tímum heimsfaraldurs, þróun bóluefna og vernd gegn COVID-19 sjúkdómi og smiti, hjarðónæmi, bólusetningu viðkvæmra hópa og bóluefni gegn nýjum afbrigðum veirunnar.

Ingileif Jónsdóttir, prófessor við læknadeild Háskóla Íslands og deildarstjóri hjá Íslenskri erfðagreiningu

Miðvikudagur 22. september kl. 20:00-21:30

Falsfréttir og upplýsingaóreiða á samfélagsmiðlum: Hver er staðan á Íslandi?

Mikið hefur verið rætt um falsfréttir og upplýsingaóreiðu undanfarin misseri en hvað segja rannsóknir okkur um stöðu mála á Íslandi? Jón Gunnar rýnir í niðurstöður, útskýrir hugtökin og tekur dæmi um upplýsingar um COVID-19 og falsfréttir í kosningabaráttunni sem nú stendur sem hæst.

Jón Gunnar Ólafsson, nýdoktor við stjórnmálafræðideild Háskóla Íslands.

Vísindakaffi á landsbyggðinni

Fimmtudagur 30. september kl. 17:00 á Bókakaffi í Bolungarvík

Stóriðja í Jökulfjörðum. Hvalveiðistöðvar norðmanna og þróun sjávarútvegs fram á miðja 20. öld. 

Dr. Ragnar Edvardsson, sérfræðingur við Rannsóknasetur HÍ á Vestfjörðum fjallar um rannsóknir sínar á hvalveiðistöðvum Norðmanna á Vestfjörðum. Stöðvarnar lögðu grunninn að íslenskum sjávarútvegi og eftir að Norðmenn voru horfnir á braut, nýttu Íslendingar sér reynslu þeirra og hófu útgerð frá sömu stöðum. Þessi útgerð hafði mikil áhrif á byggðaþróun, með nýjum atvinnutækifærum og peningastreymi. Að sama skapi hafði það neikvæð áhrif á byggðaþróun þegar útgerð var hætt og í sumum tilfellum varð svo mikil fólksfækkun að stór svæði lögðust í eyði.  

Fimmtudagur 30. september kl. 18:00 vísindakaffi og afmælishátíð Þjóðfræðistofu á Hólmavík

Rannsóknasetur HÍ á Ströndum býður til Vísindakaffis og afmælishátíðar í Hnyðju, Þróunarsetrinu á Hólmavík , fimmtudaginn 30. september kl. 18:00.

Helstu viðfangsefni Þjóðfræðistofu verða kynnt á Vísindakaffinu, m.a. sagt frá fjórum viðamestu verkefnunum sem nú er unnið að. Þau eru Menningararfur í ljósmyndum, Dagbækur fyrri alda, Fortíð og framtíð Hólmavíkur og Þjóðtrúarfléttan.

Vísindavaka á vappi 

Samstafsverkefni Rannís við Háskóla Íslands, Háskólann í Reykjavík og Veðurstofu Íslands í vísindamiðlun í nokkrum skólum Reykjavíkurborgar. Vísindavaka á vappi felur í sér að í stað þess að nemar heimsæki Vísindavökuna þá komi Vísindavakan í skólann og vísindafólk á margvíslegum fræðasviðum miðli til nemenda rannsóknum sínum á lifandi og skemmtilegan hátt. Sérstök áhersla verður lögð á loftslags- og umhverfismál, heilbrigðisvísindi og lýðræði og samfélag. Þessu verkefni verður hleypt af stokkunum á árinu 2022 vegna heimsfaraldurs.

Viðurkenning fyrir vísindamiðlun

Viðurkenning Rannís fyrir framúrskarandi vísindamiðlun verður afhent 24. september. Hægt er að senda inn tilnefningar með því að senda póst á visindavaka@rannis.is 

Sérblað tileinkað vísindum og vísindamiðlun 

Þann 24. september kemur út sérblað með Fréttablaðinu með umfjöllunum og viðtölum við fólk sem starfar við vísindi. Skoða blaðið (pdf)







Þetta vefsvæði byggir á Eplica